“خلاص يا عم حاتم مشكلتك اتحلت .. لقينا البيت اللي هتتجوز فيه .. بيت واسع وحلو .. وكمان قريب جدا مننا ” ، ده كان كلام ابويا ليا ، كان بيدور ليا علي مكان اتجوز فيه ، لان بيتنا مكون من تلات ادوار ، والتلاتة ساكنين ، الدور الاول فيه ابويا وامي ، والتاتي والتالت متجوزين فيهم اخواتي اللي اكبر مني ، عمرو ، وحسن ، والمشكلة ان البيت مينفعش يتبني عليه دور رابع ، لان المهتدس قال ان بيت بتاعكم ده اخره تلات ادوار فقط ، لكن خطر جدا يتبني عليه دور رابع ، وبصراحة فطرة الخطوبة طولت اوى ، واهل العروسة قالوا ان كده كتير وان مروحتش اخر الشهر يبقي خلاص نفضها سيرة ، ده كان كلام ابو العروسة ، وبصراحة عندوا حق ، لانوا سمع كلام كتير من الناس معجبوش ، المهم ابويا واخواتي فضلوا يفكروا يعملوا ايه ! ، اخويا عمرو اكبر واحد فينا ميل علي ابويا في ودنه وقاله حاجة ، ابويا سمع لعمرو وفكر لثانية وقال ” ايوه صح كانت تايه عن بالي فين ده ” ، ضحكت وانا بقول لابويا ” ايه هو ده يا حاج اللي كان تايه عن بالك !؟ ” ، ابويا رد وقال ” بيت الراوي ” ، بيت الراوي ده كان في نفس الشارع اللي احنا فيه ، بصيت بأندهاش وقولت لابويا ” بيت الراوي ! .. وده ماله ده يا حاج !؟ ” ، رد وقال ابويا ” ايه رأيك فيه ؟ .. بيت واسع وحلو .. رغم الكلام اللي عليه بس هو بيت حلو سعره رخيص ” ، اتكلمت وقولت لابويا بأندهاش وتعجب ” يعني انت قصدك انك تشتري بيت الراوي عشان اتجوز فيه ! ” ، ابويا هز راسه ” بأه ” ، ضحكت و قولتله ” لا متهزرش يا ابويا بلا بيت الراوى ” ، ابويا اتكلم بحدة وقال ” انا مبهزرش .. انا بكلمك بجد ” ،
رديت بنفس الضحكة وقولت ” يا ابويا بتتكلم بجد ايه ! متهزرش بقي ” ، ابويا رد وقال ” يابني والله مبهزر ” ، رديت وقولت بعد ملامح وشي اتغيرت للغضب والتعجب ” مانا مش معقولة اصدق انك عايز تسكني في بيت الرواى ده .. ده انا بخاف امشي من قدامه .. قوم اروح اسكن فيه ! .. ده مستحيل طبعا ” ، اخويا حسن واتكلم وقال ” كلام حاتم صح يا ابويا .. بيت الرواى ايه اللي عايزوا يسكن فيه ده مسكون بال … ” ، قطع كلام حسن عمرو لما قال ” مسكون بأيه بس .. دى كلها خيالات الناس بتشوفها عشان الكلام اللي بيدور عنوا .. وانا عن نفسي مشوفتش حاجة ” ، رديت وقولت ” ما هو اكيد يا عمرو اللي الكلام بيدور عنوا مش من فراغ !” ، ابويا رد وقال ” بص يا حاتم انت اتجوز فيه .. حصل معاك مشكلة فيه او مستريحتش انت ومراتك هنتصرف .. بس المهم انك تتجوز في مكان دلوقتي ” ، مكانش في حل فعلا غير بيت الراوي ، هو الحل الوحيد قدامنا حاليا ، المهم رحنا انا وابويا واخواتي لأهل العروسة واتفقنا علي يوم الفرح ، خليني اكلمك شوية علي بيت الراوى ، البيت ده من زمان اوى مقفول ، من وانا صغير وما شوفتش حد سكن في بيت الراوي ده ، مفيش غير راجل واحد بس ،
و ده كان اخر واحد من عيلة الراوي وهو الوريث الوحيد للبيت ، هو اللي بيروح ويجي علي البيت ده ، كان بيدخل جوا البيت بس محدش بيشوفوا وهو خارج منه ، لكن كنا بنشوفوا كل مرة وهو بيدخل في البيت ، بكن ولا مرة شوفته وهو بيخرج منه ، وناس كتيرة ، زى الجيران اللي حوالين البيت كله بيقول انهم عمرهم ما شافوا الراجل ده وهو خارج من البيت ، ودى كانت حاجة غريبة ، وهو كان عارض البيت للبيع ، البيت الناس كانت بتخاف تعدي قدامه بالليل ، بسبب الاصوات اللي بتخرج منه ، وكانوا بيحسوا ان في ناس عايشة في البيت ، لكن هو في الحقيقة مفيش حد ، المهم ابويا قرر يكلم الراجل ده ، وهو كان اسمه فتحي ، ابويا عرف اليوم اللي كان بيجي فيه ، كان بيجي كل يوم تلات ، ابويا استني لما جه عند البيت وراحلوا ، ابويا قال انوا عايز يشتري البيت منه ، وبالفعل الراجل خلص معاه بسرعة ومضي العقد ، و ده كان شئ واضح جدا انوا عايز يخلص من البيت ، ابويا كتب البيت بأسمي ، بيت الراوي كان مكون من دورين بس علي الشكل القديم خالص ، خرجت كل العبش القديم اللي في البيت ، وجبت عبش جديد ، بس المشكلة بقي في حيطان البيت اللي ما اجددها الافي في بوقع غريبة ظهرت عليها ، جبت الصنايعي كام مرة ويغير الدهان ، لكن نفس البوقع كانت بتظهر ، قولت لابويا رد وقال ” خلاص يا حاتم متشغلش بالك بيها ” ، اخويا حسن جه وشاف البوقع بص ليا وعنيه مبرقة وبعدين بص تاني للبوقع ، قولتله ” في ايه يا حسن ! .. يعني مقولتش حاجة !” .. يتبع
حسن باين عليه عارف حاجة !
#بيت_الراوي
رواية جرحني ولم يبالي الفصل الثالث3 بقلم بسنت اشرف
